ವಿಳಂಬ ಕ್ಷಮಾದಾನಕ್ಕಾಗಿ ಸಲ್ಲಿಸಿದ ನಿಮ್ಮ ಅರ್ಜಿಯನ್ನು ಅಂಗೀಕರಿಸಲಾಗುತ್ತದೆ ಎಂಬುದಕ್ಕೆ ಯಾವುದೇ ಖಾತರಿ ಇರುವುದಿಲ್ಲ. ಇದರ ಬಗ್ಗೆ ನಿರ್ಧಾರ ಕೈಗೊಳ್ಳುವ ಸಂಪೂರ್ಣ ಅಧಿಕಾರವು ಆದಾಯ ತೆರಿಗೆ ಇಲಾಖೆಗೆ ಸೇರಿದೆ. ಸಲ್ಲಿಕೆಯಲ್ಲಿ ಉಂಟಾದ ವಿಳಂಬಕ್ಕೆ ನೀವು ನೀಡಿರುವ ಕಾರಣವು ನೈಜ ಮತ್ತು ಸಮಂಜಸವಾಗಿದೆ ಎಂದು ಆದಾಯ ತೆರಿಗೆ ಇಲಾಖೆಯು ತೃಪ್ತಿಪಟ್ಟರೆ, ವಿಳಂಬ ಕ್ಷಮಾದಾನವನ್ನು ಮಂಜೂರು ಮಾಡಬಹುದು.

ಈ ಕೆಳಗಿನ ಕೆಲವು ಕಾರಣಗಳಿಂದ ತೆರಿಗೆ ಅಧಿಕಾರಿಗಳು ವಿಳಂಬವನ್ನು ಕ್ಷಮಿಸದಿರಬಹುದು:

1. ತೆರಿಗೆದಾರರು ವಿಳಂಬಕ್ಕೆ ಮಾನ್ಯವಾದ ಮತ್ತು ಸಮಂಜಸವಾದ ಕಾರಣಗಳನ್ನು ನೀಡಲು ವಿಫಲರಾದರೆ;
2. ತೆರಿಗೆದಾರರು ಪದೇ ಪದೇ ಕಾನೂನು ಪಾಲನೆ ಮಾಡದಿರುವ ಇತಿಹಾಸ ಹೊಂದಿದ್ದರೆ ಅಥವಾ ನಿಗದಿತ ಅವಧಿಯೊಳಗೆ ಆದಾಯ ತೆರಿಗೆ ರಿಟರ್ನ್ ಸಲ್ಲಿಸಲು ಯಾವುದೇ ಪ್ರಯತ್ನ ಮಾಡದಿದ್ದರೆ ಅಥವಾ ತೆರಿಗೆಯನ್ನು ನಿಗದಿತ ಸಮಯದಲ್ಲಿ ಪಾವತಿಸಲು ವಿಫಲರಾದರೆ;
3. ತೆರಿಗೆದಾರರು ವಿಳಂಬ ಕ್ಷಮಾದಾನಕ್ಕಾಗಿ ಸಲ್ಲಿಸಿದ ಅರ್ಜಿಯೊಂದಿಗೆ ಅಗತ್ಯವಾದ ಪೂರಕ ದಾಖಲೆಗಳು ಅಥವಾ ಸಾಕ್ಷ್ಯಗಳನ್ನು ಸಲ್ಲಿಸದಿದ್ದರೆ, ಅರ್ಜಿಯನ್ನು ತಿರಸ್ಕರಿಸಬಹುದು. ಆದ್ದರಿಂದ, ವಿಳಂಬಕ್ಕೆ ಕಾರಣವಾದ ಸಂದರ್ಭದ ಪುರಾವೆ ಸೇರಿದಂತೆ ಅಗತ್ಯವಿರುವ ಎಲ್ಲಾ ದಾಖಲೆಗಳನ್ನು ಸಲ್ಲಿಸುವುದು ಮುಖ್ಯವಾಗಿದೆ.

ಆದಾಯ ತೆರಿಗೆ ಪ್ರಾಧಿಕಾರದಿಂದ ವಿಳಂಬ ಕ್ಷಮಾದಾನ ಅರ್ಜಿಗೆ ಅನುಮೋದನೆ ಆದೇಶವನ್ನು ಪಡೆದ ನಂತರ, ತೆರಿಗೆದಾರರು ಆದಾಯ ತೆರಿಗೆ ರಿಟರ್ನ್ ಅನ್ನು ಸಲ್ಲಿಸಬೇಕು.

ನಿಮ್ಮ ವಿಳಂಬ ಕ್ಷಮಾದಾನ ಅರ್ಜಿಯು ಮಂಜೂರಾದ ನಂತರ, ನೀವು ಈ ಕೆಳಗಿನ ಹಂತಗಳನ್ನು ಅನುಸರಿಸಿ ಮುಂದುವರಿಯಬಹುದು:

• ನಿಮ್ಮ ಆದಾಯ ತೆರಿಗೆ ರಿಟರ್ನ್ ಅನ್ನು ಅಪ್ಲೋಡ್ ಮಾಡಿ
• ಅಪ್ಲೋಡ್ ಮಾಡಿದ ರಿಟರ್ನ್ ಅನ್ನು ಇ-ಪರಿಶೀಲಿಸಿ